Xaime Díaz Alonso

Graduado en Deseño de interiores na Escola de Arte e Superior de Deseño Pablo Picasso da Coruña, Xaime Díaz (Carballo, 1962) traballa como axente de Inspección no Servizo de licenzas e disciplina da área de Urbanismo do Concello de Carballo. Colaborou nas publicacións A arte no Val do Barcala, de José Cardeso Liñares —na que realizou a medición e delineación dos debuxos das igrexas parroquiais de Negreira e da Baña—, e Neoclasicismo galego: seis edificios galegos reproducidos, de José Ramón Soraluce Blond —cun traballo similar sobre o edificio das Casas de Paredes na Coruña—. Foi un dos fundadores, encargado da maquetaxe, redactor e debuxante do fanzine A Ameixa Cacofónica, e asinou deseños gráficos para o Padroado Deportivo Municipal de Carballo, a homenaxe a Alfredo Brañas, as Escolas Taller de Carballo e Buño, Feiraber e Concello de Malpica, entre outros. Autor das rutas urbanas pola súa vila natal, tamén tivo un papel importante, como fundador, directivo e socio, de asociacións e iniciativas coma Adega Bergantiños, Cineclub Carballo, grupo de teatro Ártabro, a emisora de radio Carballo 105, Telón e Aparte, FIOT, Escola de Básket Xiria. Colaborou na realización das esculturas urbanas Peixe, Escalo e Enredos, do artista plástico Manuel Facal.