- Ceraría e obradoiro de chocolates Mariño (rúa Cervantes), casa do concello (praza do Concello), edificio da antiga Caixa de Aforros de Galicia (rúa Vázquez de Parga)
—Ao fondo da rúa —continuou Rosa— estaba a casa do concello, un edificio de cubos asimétricos dos anos setenta, de seis alturas e cun aire piramidal. Agora confundíase co resto do entullo e as árbores arrincadas da alameda, coas lápidas do marmorista e os carteis dos bares. Polo recendo intuín onde estivera o obradoiro de Chocolates Mariño. Ollei en busca da outra altura sinalada do centro, o edificio da caixa de aforros, pero sobre a poeira non medraba construción ningunha.
Localización do panel: ceraría e obradoiro de chocolates Mariño (rúa Cervantes).
- Antiga casa do concello (praza do Concello) antiga igrexa (rúa Martín Herrera), antigos Baños e Casa da Condesa (rúas Baños Vellos, Ourense e Estrela), igrexa da parroquia de Bértoa
Daquela lembrei as fotos que saían de cote nos programas das festas e nos libros das crónicas, cando de golpe se dinamitara o Concello Vello e se derruíran a Igrexa, os Baños e a Casa da Condesa. Todos os maiores falaban diso, de que Carballo parecía Dresde bombardeada, que tiña vocación de entullo. O certo é que no primeiro arrouto deume por ir cara o centro, púidome dar por fuxir e o meu futuro sería distinto, non quedaría alá dentro. A noite caeu e inmobilizoume. Co abrente camiñei en dirección a Bértoa e á altura da igrexa, agora por terra, vin os homes tras as primeiras pezas do muro.
- Parroquia de Entrecruces, lugar da Ponte Rosende, lugar da Brea, estanco Milagrosa (avenida da Milagrosa), antiga Caixa de Aforros do barrio da Milagrosa (avenida da Milagrosa), barrio da Milagrosa.
O condutor xa notara un sopro no motor pola costa da Ponte Rosende, mesmo no descenso de Anxeriz a Entrecruces. Agora baixaba desde o Arrabaldo da Brea cara a Carballo pola estrada de Santiago e, chegando ao cruzamento a carón do Anllóns, sentiu o fallo nos freos. Os seus intentos por controlar o camión foron tan bruscos que provocaron a rotura da dirección e a cisterna foise esnafrar contra o estanco e a Caixa de Aforros. O último que viu foi que comía o caixeiro automático, un yihadista sen causa.
- Antiga dozaría Vella (rúa Martín Herrera), antiga libraría, quiosco e papelaría Casa San Ramón (rúa Desiderio Varela), antiga farmacia de Loli Pan (rúa Valle-Inclán)
O peor era o pan. Aos oito días deixei de comelo. Bergantiños fora un dos graneiros de Galiza e a Carballo dáballe sona o pan, os fornos de leña, pero el foi o primeiro en desaparecer. En realidade non era doado localizar as panaderías, non era doado localizar sitio ningún, nin sequera saber en que rúas estabas ou orientarte minimamente. As pedras derruídas deixaban de ser “parte de”, deixaban de ser fitos, integrábanse no entullo e listo, tanto tiña se antes formaran o ollo dunha ponte, a nave dun almacén ou un cortello para o gando: todas pedras. Cando cría remexer entre os restos da Docería Vella atopaba as chilindradas dun todo a cen. Buscaba medicinas na farmacia de Loli e aparecían os almanaques da librería San Ramón. Esgotador.
- Avenida Ponte da Pedra, Centro Comercial Bergantiños (rúa Perú), rúa Lagarto.
—Siii! Vivían na Ponte da Pedra, nas casas novas a carón do centro comercial. A casa de mamá estaba na rúa do Lagarto, case eramos veciños. Como non mo dixeches antes? Dáme unha aperta.
Xurxo Borrazás (Carballo, 1963) licenciouse en Filoloxía Xermánica pola Universidade de Santiago e é profesor de inglés nun centro de ensino secundario de Vigo, cidade na que reside desde 1990. Tradutor ao galego de Trópico de Cáncer, de Henry Miller, e de O ruído e a furia, de William Faulkner, así coma de textos de carácter divulgativo, ten colaborado en xornais e revistas de todo o Estado, como El País, Nós Diario, Tempos Novos ou Grial. Sen dúbida o escritor más importante dos nacidos en Carballo, está considerado tamén como un dos autores máis destacados da literatura galega do século XXI.
Narrativa e ensaio
Brevedume. Galaxia, 2020.
Covalladas. Prosa vertical. Galaxia, 2010.
Costa Norte/ZFK. Galaxia, 2008.
Arte e parte. Dos patriarcas á arte suicida. Galaxia, 2007. Premio da Crítica de Galicia 2008 na categoría Ensaio e Pensamento.
Ser ou non. Galaxia, 2004. Traducida ao castelán, ao portugués e ao ruso.
Pensamentos impuros. Xerais, 2002. Traducida ao castelán.
Na maleta. Sotelo Blanco, 2000. Premio Antón Losada Diéguez 2001.
O desintegrista. Xerais, 1999.
Contos malvados. Xerais, 1998.
Eu é. Sotelo Blanco, 1996. Traducida ao castelán.
Criminal. Sotelo Blanco, 1994. Premio da Crítica Española 1994 e Premio Arcebispo San Clemente 1995. Traducida ao inglés.
Cabeza de chorlito. Sotelo Blanco, 1991. Traducida ao castelán.
En obras colectivas
Contos de taberna. Edicións Embora, 2014.
Follas de Carballo. Asociación Cultural Lumieira, 2011.
En defensa do Poleiro. A voz dos escritores galegos en Celanova. Toxosoutos, 2010.
From the beginning of the sea / De onde comeza o mar. Foreign Demand, 2008.
Volverlles a palabra. Homenaxe aos represaliados do franquismo. Difusora, 2006.
Narradio. 56 historias no ar. Xerais, 2003.
Materia prima: relatos contemporáneos. Xerais, 2002.
Longa lingua: Os contos da Mesa. Xerais, 2002.
Novo do trinque. BNG, 1997.
Traducións
O ruído e a furia, de William Faulkner. Galaxia, 2008.
Trópico de Cáncer, de Henry Miller. Galaxia, 2006.
